एनआरएनए भवन बनाउन हङकङबाट ७० लाख संकलन

Date: 23 Nov 2016 | Source: NRNA

एनआरएनए भवन बनाउन हङकङबाट ७० लाख संकलन

२३ नोवम्बर, हङकङ । गैरआवासीय नेपाली संघको काठमाण्डौंमा आफ्नै केन्द्रिय कार्यालय भवन बनाउन हङकङस्थित गैरआवासीय नेपालीहरूले ७० लाख रूपैयाँ संकलन गरेका छन् ।

 गैरआवासीय नेपाली संघ हङकङ कार्य समितिले गत नोभेम्बर २३ तारिखका दिन आयोजना गरेको रात्री भोजमा कार्यसमिति सदस्य, सल्लाहकार, बिभिन्न सामाजिक संघसंस्थाका अगुवाहरु, बौंद्धिक तथा व्यापारिक व्यक्तित्वहरुबाट ७० लाख रूपैयाँ संकलन भएको हो ।

गैरआवासीय नेपाली संघका केन्द्रीय अध्यक्ष शेष घलेको उपस्थीतिमा आइतबार चिमशाचुई स्थित मिरा आर्केडमा रहेको कवाव फ्याक्टरी रेष्टूरेण्टमा आयोजित च्यारिटी डिनर पार्टीमा उपस्थीत गैरआवासीय नेपाली अभियन्ताहरूले आफ्नै भवन बनाउने शुभकार्यमा हातेमालो गरेका हुन् ।

उहाँहरूसहित गैरआवासीय नेपाली संघका सल्लाहकार तथा राष्ट्रिय समन्वय परिषद (रासप) हङ्कङ्गका पूर्व अध्यक्ष त्रिलोक गुरुङ र रासप हङ्कङ्गका संस्थापक अध्यक्ष कृष्णप्रसाद पाण्डे तथा केन्द्रिय सदस्य जेएन ज्ञवाली लगायतका अगुवाबाट करिव ६० लाख र कवाव फ्याक्टरीका प्रबन्धक राजेशकुमार भिमसरियाबाट १० लाख गरि ७० लाख नेपाली रकम संकलन गरिसकेको छ ।

एनआरएन एनसीसी हङकङले आउने डिसेम्बर महिनाको २० तारिखसम्म सहयोग रकम संकलन गर्ने हुदाँ हङकङबासी नेपालीहरूबाट अझै थप रकम सहयोग हुने कुरामा विश्वस्त हुँदै अन्तिम समय सम्ममा सहयोग रकम अझै बढ्ने संस्थापक अध्यक्ष कृष्णप्रसाद पाण्डेले बताए ।

एनसीसी हङकङलाई आफ्नो क्षेत्रबाट करिब ३० लाख नेपाली रकम संकलन गर्नुपर्ने लक्ष्य रहेको थियो । केन्द्रिय अध्यक्ष शेष घले कार्यालय भवन बनाउन लाग्ने रकम संकलनको लागि विश्वका ७० वटा मुलुकमा फैलिएको गैरआवासीय नेपाली संघका सदस्यहरूसंग भेटघाटको सन्दर्भमा आइतबार बिहान हङकङ आईपुग्नुभएको थियो । हङकङ चेकलाप कोक एयरपोर्टमा अध्यक्ष घलेलाई गैरआवासीय नेपाली संघ हङकङका अध्यक्ष दुर्गा गुरुङ तथा कार्य समिति र सल्लाहकारहरूको टोलीले स्वागत गरेको थियो ।

हङकङ कमिटीका अध्यक्ष दुर्गा गुरुङको अध्यक्षतामा आयोजित च्यारिटी डिनरमा केन्द्रिय अध्यक्ष घलेले आफ्नो मन्तव्यको क्रममा धेरै निजी कामहरु थाँती राखेर गैरआवासीयको आफ्नै भवन बनाउने यो कार्यमा खटेको र विश्वका धेरै मुलुकहरूबाट टार्गेट गरेको रकम भन्दा उत्साजनकरुपमा सहयोग रकम संकलन भैरहेको बताउनुभयो । विश्वका नेपालीहरूको यो उत्साहजनक सहयोगले गर्दा भवन चाडैं बन्नेकुरामा आफू ढुक्क भएको पनि बताउनुभयो । अनुमान गरेभन्दा बढि रकम संकलन हुने अवस्थाले गर्दा गैरआवासीय नेपाली सघले आफ्नो कार्यालय भवन मार्फत थप आय आर्जन गर्न सक्ने संभावना समेत रहेको उहाँले औंल्याउनु भयो ।

कार्यक्रममा भवन निर्माणका लागि हङकङबाट सहयोग संकलन समितिका संयोजक दिलिप गुरुङले समितिले गरेको कार्यहरूले संकलित रकमको बारेमा जानकारी दिनुभएको थियो भने उपाध्यक्ष श्रीमती टिका गुरुङको स्वागत मन्तव्य रहेको कार्यक्रमलाई सचिव बिनय शाहले संचालन गर्नुभएको थियो ।  कार्यक्रममा हङकङको निजी भ्रमणमा रहेका पूर्व केन्द्रिय कानूनी सल्लाहकार दिनेश त्रिपाठीको पनि उपस्थिति रहेको थियो ।

 

गैरआवासीय नेपाली संघ सचिवालय ।